Василий Никифоров – Күлүмнүүр аатынан “Тойон Мүрү” култуура дыбарыаһа саҥа сылы көрөөччү биһирэбилин ылан, сонун туруоруунан ситиһиилээхтик көрүстэ. Кэнники сылларга маннык көхтөөхтүк дьон-сэргэ тэрээһиннэргэ сылдьыыта, кыттыыта, өрө көтөҕүллүүтэ култуура дьиэтэ саҥа уораҕайга киириэҕиттэн ыла өссө тэтимирэн, үлэ-хамнас саҥа тыыны ылан салаллан иһэрэ харахха быраҕыллар.
“Хаарчаана кастина” Саҥа дьыллааҕы музыкальнай дьүһүйүү дьон көрдөһүүтүнэн бэҕэһээ өссө биирдэ сыанаҕа оонньонон, эмиэ сааланы тобус толору көрөөччүлээх үрдүк таһымҥа буолан ааста.
Бу сонун туруоруу уопсай үлэтэ хайдах барбытын туһунан уонна билиҥҥи көрөөччү ирдэбилин, ситиһиилээх бырайыактары олоххо киллэрии тула култуура дыбарыаһын култуурунай-маассабай тэрээһиннэрин отделын сэбиэдиссэйэ, “Кастинг Хаарчаана” музыкальнай дьүһүйүү сүрүн режиссера Александр Бурцев санаатын үллэһиннэ.
— Быйыл өтөрүнэн тахсыбатах көстүү буолла диэххэ сөп, ол курдук, саҥа туруоруубут иккитэ аншлагынан, билиэттэрэ толору атыыга баран, ситиһиилээхтик буолан ааста. Музыкальнай дьүһүйүүнү бырааһынньык сүпсүлгэнигэр көтүтэн көрбөтөхтөр элбэхтэр эбит, оннооҕор иккистээн кэлэн хат көрбүттэр кытта баалларын билэн соһуйдубут да, үөрдүбүт даҕаны. Нэһилиэктэртэн кэлэн көрөн бардылар, Суоттуттан бүтүн автобус киирбит диэтилэр, Кэптэниттэн, Чараҥтан, Майаҕастан, о.д.а. бөһүөлэктэн кэлэн “астынан, сэргэхсийэн” бардыбыт диэн үгүс киһи эттэ. Онон үөрэн, долгуйан олоробут, толору көрөөччүлээх саалаҕа көрдөрбүппүтүттэн чахчы дуоһуйдубут, астынныбыт.
Екатерина Захарова
@uamurusahargata
