Бу дьыл Муус устар 25 күнүгэр, Уус Алдан улууһун В.В. Никифоров-Күлүмнүүр аатынан култуура дыбарыаһыгар драматург Степан Ефремов комедиятынан «Хобороос хоһооно» диэн сонун көрүүлээх, ураты ис хоһоонноох музыкальнай испэктээк буолан ааста. Көрөөччү уораҕайы лыык курдук толорон, иһийэн олорон, олус кэрэхсээн көрдө-иһиттэ. Дыбарыас үлэһиттэрэ бу хаһыс даҕаны сонун бырайыактарынан Уус Алдан олохтоохторун үөрдэллэр. Испэктээх туруорааччыта уонна сценариһа, В.В. Никифоров-Күлүмнүүр аатынан култуура дыбарыаһын уус уран салайааччыта Александр Гоголев санаатын маннык үллэһиннэ: – Бу музыкальнай испэктээкили туруоруу биһиги дыбарыаспыт үлэтигэр-хамнаһыгар саҥа тыыны, саҥа сүүрээни киллэриэхтээхпит диэн толкуйтан тахсыбыта. Тоҕо чуолаан бу драматург Степан Ефремов «Хобороос хоһооно» пьесатын таллыгыт диир буоллахха, чэпчэки тыыннаах кэмиэдьийэ диэн талан ылбытым. Көрөөччү ордук кэрэхсээн, интэриэһиргээн көрдүн диэн бу пьесаны музыкальнай жанрдаах оҥорбутум. Сценографиятыгар, испэктээги толкуйдаан туруорууга, артыыстарын талыыга үлэлээтим. Режиссерунан Александр Бурцев улэлээтэ. Үҥкүүлэри дыбарыас балетмейстера Ольга Петрова туруорда. Оттон ырыаһыттары үөрэтэн-такайан, вокалга биһиги хормейстербыт Айыына Сивцева бэлэмнээтэ. Артыыстар көстүүмнэригэр биһиги костюмербыт Любовь Босикова үлэлэстэ, реквизиттэри, сыананы оҥорууга декораторбыт Саян Пестряков үлэлээтэ. Түгэнинэн туһанан, уус уран самодеятельность кыттыылаахтарыгар Матрена Васильеваҕа, Иван Окоемовка улахан махталбытын тиэрдиэхпин баҕарабын. Бэйэлэрэ тус үлэлээх дьон быыс-арыт булан, бириэмэлэрин, дууһаларын ууран туран, сүрдээх үчүгэйдик бэлэмнэнэн дьон-сэргэ кэрэхсэбилин ыллылар диэн биһиги олус үөрэбит, астынабыт. Маны сэргэ, бэйэбит үлэһиттэрбит, видеотехникпыт Юрий Стручков, аранжировщикпыт Семен Орлов, хормейстербыт Айыына Сивцева артыыстаатылар. Мин бэйэм Яков диэн биир сүрүн оруолу толордум. Түмүккэ, табылынна, дьон-сэргэ биһирэбилин ылла диэн үөрэбит, астынабыт уонна мантан кынаттанаммыт, бу курдук биир үчүгэй хамаанда буолан, өссө даҕаны атын бырайыактарга үлэлэһиэхпит диэн эрэллээхпин». Үтүөкэн киэһэлэри, чаҕылхай туруоруулары, сэргэх тэрээһиннэри бэлэхтиир дьоммутугар, В.В. Никифоров-Күлүмнүүр аатынан култуура дыбарыаһын үлэһиттэригэр инникитин өссө даҕаны кэскиллээх саҥа саҕалааһыннары, сонун бырайыактары баҕарабыт, бу курдук дьону-сэргэни сырдыкка-кэрэҕэ угуйа, ыҥыра туруҥ!