🟠⚫🟠⚫🟠⚫🟠⚫🟠⚫🟠⚫🟠⚫
Улуу Кыайыы 76 сылыгар аналлаах миитин “Батыйа” мемориальнай комплекска ыытылынна. Аҕа дойду көмүскэлигэр өлбүттэр кэриэстэригэр “Өйдөбүнньүк уоту” улуус баһылыга Алексей Федотов, улуус ветераннарын Сэбиэтин председателэ Олег Федоров уматтылар. Бэйэлэрин олохторун, күүстэрин-уохтарын төрөөбүт дойдуларын көҥүлүн туһугар толук уурбуттарга биир мүнүүтэлээх курутуйуу биллэрилиннэ. Эйэлээх олоҕу аҕалбыт аҕа көлүөнэҕэ сүгүрүйэн туран Мүрү нэһилиэгин ыччата венок уурда. Улуу Кыайыы 76 сылынан эҕэрдэ тыллары улуус баһылыга Федотов А.В.,улуус депутаттарын Сэбиэтин председателэ Колодезников И.И., улуус ветераннарын Советын председателэ Федоров О.Ф., Мүрү нэһилиэгин сүрүннүүр специалиһа Шепелев С.П., улуус ыччакка политикатын сүрүннүүр специалиһа Бурнашев В.М. эттилэр. Махталлаах көлүөнэ ааттарыттан сэрии, Кыайыы үҥкүүтүнэн «Дьүөгэ» үҥкүү бөлөҕө, ырыатынан Марсен Протопопов эҕэрдэлээтилэр.
Быйыл иккис сылын хамсык дьаҥа турбутунан Кыайыы күнэ маассабайдык ыытыллыбата. Ол да буоллар улууска сэрии, тыыл ветераннарын, сэрии кэмин оҕолорун эҕэрдэлээһиннэр, көмө үлэлэр, бырааһынньыктааҕы тэрээһиннэр ыытылла тураллар.