Биир дойдулаахпыт Наталья Протопопова кулун тутар 1 күнүттэн 10 күнүгэр диэри Бороҕоҥҥо, Күлүмнүүр аатынан култуура Дыбарыаһыгар “Кэрэни үйэлиир күлүм түгэн” диэн быыстапка «Айар сэһэн» бырайыагынан арыллынна. Истин иһирэх кэпсэтиигэ, Наталья Протопопова оҕо сааһыттан саҕалаан «фьюзинг» диэн ураты дьарыгын туһунан, хаартыскаҕа туһэрии алыптаах эйгэтигэр хайдах кэлбитин туһунан кэпсээтэ, сүбэ-ама биэрдэ. Кыттыыны ыллылар, Уус-Алдан улууһун баһылык солбуйааччыта М.В. Борисов, Улуус культууратын управлениятын начальнига И.И. Аммосов, Чаран бөһүөлэгиттэн учууталлара, куораттан, Бороҕонтон доҕотторо, дьиэ кэргэнэ. Көрсүһүүнү киэргэттэ «С.А. Зверев-Кыыл Уола» аатынан Саха Национальнай үнкүү театрын артыыската Василена Шарина-Улан.
Наталья Протопопова фотограф идэтигэр 2018 сылтан үлэлиир, Сахабыт сирин кэрэ Куоларын “Мисс Якутия” куонкуруһугар тургуппуттара, талааннаах кыыһы фотограбынан “Лофт” фотостудияҕа үлэҕэ ыҥырбыттара. Инники араас эйгэҕэ үлэлээн, дьүөгэлэрин хаартыскаҕа түһэрэн, истин кынаттанан, инники баҕа санаатын толорон фотограф идэтин талбыт. Кэрэ анардары түһэрэрин сөбүлүүр, бэйэлэрин таптыахтарын, ис кыахтарыгар эрэниэхтэрин баҕаран туран. Хаартыскаҕа түһэрэригэр киэргэтэн, уобарастарын талан, күннээҕи олохторуттан отой ураты киһини оҥорон таһаарарын астынар. “Дьон үөрбүт харахтарын көрөртөн ордук туох да суох”- диэн этэр. Наталья Протопопова дьон кэрэ сэбэрэтин, бэлиэ күннэрин, үөрүүлээх түгэннэрин хаартыскаҕа түһэрэн үйэлээх история оҥорор аналлаах. Дьону кытта алтыһарын туохтааҕар да ордорор, кэпсэтэн-ипсэтэн устуудьуйатыгар ураты эйгэни олохтуур, олус холку фотосессиялары оҥорор.
Наталья Протопоповаҕа өссө да үрдүк таһаарыылаах айымньылаах үлэни, саҥаттан саҥа бырайыактары, дьиэ кэргэнигэр дьолу баҕарабыт!