Бүгүн В.В. Никифоров-Күлүмнүүр аатынан «Тойон Мүрү» култуура дыбарыаһыгар настаабынньык, новатор педагог, хоровой искусствоҕа саха оҕотун дэгиттэр талаанын аан бастаан аан дойдуга таһаарбыт самородок хормейстер, самодеятельнай композитор, уопсастыбаннай диэйэтэл, суруналыыс, уоскулаҥы билбэт уһуйааччы Василий Парников педагогическай, айар үлэтин 60 сылынан, “Тойон Мүрү” мелодистар түмсүүлэрэ тэриллибитэ 45 сылынан «Айар үлэттэн көтөллөр көмүс дорҕооннор» үөрүүлээх түһүлгэ буолла.
Үбүлүөйдээх киэһэҕэ Василий Степановичка истиҥ эҕэрдэ тыллара этилиннилэр. Ол курдук Уус Алдан улууһун баһылыга Василий Аммосов, үөрэх управлениетын начаалынньыга Степан Литвинцев, култуура управлениетын начаалынньыга Сергей Нафанаилов, култуура үлэһиттэрин идэлээх сойуустарын бэрэссэдээтэлэ Галина Аммосова, «Юные Якутяне» өрөспүүбүлүкэтээҕи ресурснай киин бэрэстэбиитэлэ Гаврил Кудрин, Мүрү 1-гы N-дээх орто оскуолатын дириэктэрэ Игорь Сивцев, «Мүрү саһарҕата» хаһыат кылаабынай эрэдээктэрэ Наталья Попова, Мүрү нэһилиэгин баһылыга Прокопий Румянцев, араас сылларга үөрэппит оҕолоро, о.д.а. кини ырыа кэрэ эйгэтигэр сирдээбит дьоно, биир идэлээхтэрэ, доҕотторо, бииргэ алтыһар мелодистара.
Ону таһынан бу күн 45 сыллаах үбүлүөйдээх «Тойон Мүрү» мелодистар түмсүүлэрин чилиэннэрэ араас наҕараадаларынан бэлиэтэннилэр. Мантан киэһэ култуура дыбарыаһыгар ыллам ырыа түһүлгэтэ салҕанар.
Источник: https://t.me/uamurusahargata
