Драматург Степан Ефремов комедиятынан «Хобороос хоһооно» диэн сонун көрүүлээх, ураты ис хоһоонноох музыкальнай испэктээкил иккиһин ситиһиилээхтик көрдөрүлүннэ. Ол курдук, бастакы көрдөрүүгэ көрөөччү биһирэбэлин лыык курдук толорон, олус кэрэхсээн көрдө-иһиттэ, оттон бүгүҥҥү түһүлгэ эмиэ долгутуулаахтык уонна көхтөөхтүк ааста. Дыбарыас үлэһиттэрэ бу хаһыс даҕаны сонун бырайыактарынан Уус Алдан олохтоохторун үөрдэллэр, сүргэлэрин көтөҕөллөр.
Испэктээкил туруорааччыта уонна сценариһа, В.В. Никифоров-Күлүмнүүр аатынан култуура дыбарыаһын уус уран салайааччыта Александр Гоголев бэйэтин санаатын маннык үллэһиннэ:
— Бу музыкальнай испэктээкили туруоруу биһиги дыбарыаспыт үлэтиҥ-хамнаһыгар саҥа тыыны, саҥа сүүрээни киллэриэхтээхпит диэн толкуйтан тахсыбыта. Тоҕо чуолаан бу драматург Степан Ефремов «Хобороос хоһооно» пьесатын таллыгыт диир буоллахха, чэпчэки тыыннаах кэмиэдьийэ диэн талан ыллыбыт. Көрөөччү ордук кэрэхсээн, интэриэһиргээн көрдүн диэн бу пьесаны музыкальнай жанрдаах оҥордубут. Сценографиятыгар, испэктээкили толкуйдаан туруорууга, артыыстарын талыыга күүстээх үлэни ыыттыбыт.
Ол курдук, режиссерунан Александр Бурцев үлэлээтэ. Үҥкүүлэри дыбарыас балетмейстера Ольга Петрова туруорда. Оттон ырыаһыттары үөрэтэн-такайан, вокалга хормейстер Айыына Сивцева бэлэмнээтэ. Артыыстар көстүүмнэригэр костюмер Любовь Босикова үлэлэстэ, реквизиттэри, сыананы оҥорууга декоратор Иван Охлопков кылаатын киллэрдэ.
Түгэнинэн туһанан, уус уран самодеятельность кыттыылаахтарыгар Матрена Васильеваҕа, Иван Окоемовка улахан махталбытын тиэрдиэхпитин баҕарабыт. Бэйэлэрэ тус үлэлээх дьон быыс-арыт булан, бириэмэлэрин, дууһаларын ууран туран, сүрдээх үчүгэйдик бэлэмнэнэн дьон-сэргэ кэрэхсэбилин ыллылар диэн биһиги олус үөрэбит, астынабыт. Маны сэргэ, бэйэбит үлэһиттэрбит, видеотехник Юрий Стручков, аранжировщик Семен Орлов, хормейстер Айыына Сивцева артыыстаатылар. Мин бэйэм Яков диэн биир сүрүн оруолу толордум.
Түмүккэ, табылынна, дьон-сэргэ биһирэбилин ылла диэн үөрэбит, астынабыт уонна мантан кынаттанаммыт, бу курдук биир үчүгэй хамаанда буолан, өссө даҕаны атын бырайыактарга үлэлэһиэхпит диэн эрэллээхпит, — диэн санаатын түмүктээтэ.
Үтүөкэн киэһэлэри, чаҕылхай туруоруулары, сэргэх тэрээһиннэри бэлэхтиир дьоммутугар, В.В. Никифоров-Күлүмнүүр аатынан култуура дыбарыаһын үлэһиттэригэр инникитин өссө даҕаны кэскиллээх саҥа саҕалааһыннары, сонун бырайыактары баҕарабыт. Сахабыт төрүт култуурата, тыына үйэлэри уҥуордаан сайда турдун!
