10 сыллааҕыта Валентина Алексеевна тэрийбит «Дьүөгэ» үҥкүүтүн бөлөҕүн айар киэһэтэ кыттааччылар да, көрөөччүлэр да өттүлэриттэн өрө көтөҕүллүүлээхтик олус да үчүгэйдик ааста. Нэһилиэктэрбит улахан дьон коллективтара Мүрүттэн «Алгыс», «Виктория», «Тойон Мүрү», «Күндүүнэ» Найахыттан «Чэлгийээнэ», Мындаабаттан «Күнчээнэ», Бэйдиҥэттэн «Эр Модун» эр дьон ансаамбыла кэлэн кыттыыны ыллылар. Валентина Алексеевна тэрийбит хореографтар түмсүүлэрэ, «Дьүөгэ» бөлөҕө, искусство оскуолатын кылааһа ситиһиилээхтик, түмсүүлээхтик үлэлии сылдьаллара бу кини кэскиллээх үлэтин салгыыта, түмүгэ буолар. Валентина Алексеевна айар үлэтин салҕааччылар Ульяна Петровнаҕа, Ольга Семеновнаҕа уонна иитэн-такайан таһаарбыт үҥкүүһүттэригэр барҕа махтал. Үҥкүү кэрэ эйгэтигэр сыстыбыт, сөбүлээн дьарыктаммыт киһи хаһан баҕарар кэрэ дууһалаах, ыраас санаалаах буолар. Дьүөгэлэр айар киэһэлэрэ олус тэрээһиннээхтик, тобус толору көрөөччүлээх киһи астынар гына ааста.
