Бүгүн сэтинньи 30 күнүгэр Василий Васильевич Никифоров-Күлүмнүүр аатынан «Тойон Мүрү» култуура дыбарыаһыгар 45 сылын ыытыллар өрөспүүбүлүкэтээҕи «Мүрү-2023» ырыа күрэҕэ бэрт тэрээһиннээхтик буолан ааста.
Күрэххэ уопсайа 5 улуустан уонна Дьокуускай куораттан 29 ырыаһыт кыттыыны ылла.
Быйылгы үбүлүөйдээх куонкуруска дьүүллүүр сүбэҕэ эстрада биллэр ырыаһыттара, биир дойдулаахтарбыт Анастасия Готовцева, Владимир Заболоцкай уонна Ырыа Саарын-Александр Дьячковскай сүбэлэрин холбоон үлэлээтилэр итиэннэ куонкурус түмүгүнэн кыайыылаахтар гала кэнсиэрдэрин ылбаҕай ырыаларынан киэргэттилэр.
Оттон 45-с төгүлүн дьон-сэргэ биһирэбилин ылан ыытыллар «Мүрү-2023» ырыа күрэҕин кыайыылаахтарынан: 1 степеннээх лауреат Зинаида Лукачевская (Дьокуускай), 2 степеннээх лауреат Аман Винокуров (Чурапчы) уонна 3 степеннээх лауреат Артем Тюканов (Нам) буоллулар.
Оттон куонкурус муҥутуур кыайыылааҕынан Уус Алдан улууһун Найахы нэһилиэгиттэн Евдокия Фомина буолан, Гран-при үрдүк аатын сүктэ.
Бу курдук бастыҥ ырыа түһүлгэтэ талааннаах дьоммутугар тирэх буолан, саҥа ааттары арыйан өрүү дьон-сэргэ, көрөөччү кутун тутан, үөрүүнү бэлэхтии турдун.
