Улууспутугар икки күннээх «Мүрү үҥкүүлүүр» II республиканскай күрэхпит олус тэрээһиннээхтик, үрдүк таһымҥа ааһарыгар күүс-көмө, өйөбүл буолбут дьоммутугар улууспут Аҕа баһылыгар Василий Иванович Аммосовка, культурабыт начальнигар Сергей Сергеевич Нафанаиловка, бары коллегаларбытыгар «Тойон Мүрү» культура дыбарыаһын сал. Борисова Алина Ивановнаҕа, Бороҕоннооҕу искусства оскуолатын сал. Гаврил Егорович Петуховка бары үлэһиттэригэр, хореографтар түмсүүлэрин аатыттан Барҕа Махталбытын тиэрдэбит!
Улууспутугар «Мүрү үҥкүүлүүр» күрэхпит 1990 сылтан киэн туттар ветеран хореографпыт, үҥкүү туһунан элбэх кинигэ автора, Саха Өрөспүүбүлүкэтин культуратын Үтүөлээх үлэһитэ Мария Захаровна Сивцева көҕүлээн, тэриллэн ыытыллар. Былырыын республикабытыгар аан бастаан тэриллибит Уус-Алдан улууһун хореографтарын түмсүүтэ тэриллибитэ 25 сылыгар аналлаах үбүлүөйүн көрсө «Мүрү үҥкүүлүүр» күрэхпитин Республиканскай таһымнаах гына тэрийбиппит. Быйыл иккис сылбытыгар Абыйтан, Чурапчыттан, Мэҥэ Хаҥаластан, Намтан, Дьокуускайтан, Хатастан, Уус-Алдантан уопсайа икки күн устата оҕолорго 27 коллектив 389 оҕо, улахан дьоҥҥо 21 коллектив 201 улахан киһи кыттыыны ыллылар. Икки кһннээх кһрэхпитин Республикабытыгар биллэр-көстөр, ааттаах-суоллаах хореографтар дьүүллээтилэр:
Терютин Николай Николаевич култуура министерствотын Өрөспүүбүлүкэтээҕи норуот айымньытын дьиэтин сүрүннүүр специалиһа, РФ уопсай үөрэхтээһинин бочуоттаах үлэһитэ, СР култууратын, үөрэҕириитин туйгуна, «Методист Якутии», «Учууталлар учууталлара» бэлиэ хаһаайына.
Прокопьева Елена Степановна Уус-Алдан улууһун бастакы идэлээх хореограба, ССРС культуратын, Саха Өрөспүүбүлүкэтин үөрэҕириитин туйгуннара.
Степанов Станислав Николаевич Аграфена Дмитриевна Макарова аатынан культура уонна искусство коллеһын үҥкүү салаатын салайааччыта, преподавателэ, Саха Өрөспүүбүлүкэтин культуратын үтүөлээх үлэһитэ, «Мүрү үҥкүүлүүр» күрэх дьүүллүүр сүбэтин председателэ.
Сидорова Анастасия Марковна культура уонна искусство Аартикатааҕы государственнай институт доцена, Саха Өрөспүүбүлүкэтин культуратын уонна профессиональнай үөрэхтээһинин туйгуна, Аан дойдутааҕы хореографтар союзтарын чилиэнэ.
Дмитрий Артемьев — Саха Республикатын народнай, Россия үтүөлээх артыыһа, Кыыл Уолун аатынан Үҥкүү тыйаатырын сүрүн артыыһа, Саха Республикатын үтүөлээх оһуохайдьыта, Россия театральнай Союзтарын чилиэнэ.
Күрэхпит өссө да үүнэ-чэчирии, сайда турарыгар, Республикабытыгар үҥкүү искусствотын сайдыытыгар Уус-Алданнар дьоһун кылааппытын киллэрсэр улахан-таһымнаах күрэх буола улаатарыгар баҕарабыт!
