Саха сирин норуоттарын XIII-с спортивнай оонньуулара саҕаланаллара биир күн хаалла. Уус Алдан сиригэр-уотугар икки өттүнэн киирэр айан суолун кыраныыссатыгар Суотту уонна Бэйдиҥэ суолугар биир дойдулаахтарбыт ыалдьыттары сахалыы сиэринэн уруйдуу-айхаллыы көрүстүлэр.
Бу туһунан А.П. Петров аатынан Бэйдиҥэтээҕи норуот айымньытын киинин дириэктэрэ Игнатий Слепцов бу курдук иһитиннэрдэ: “Бүгүн от ыйын 3 күнүттэн, Саха сирин норуоттарын 8-с спортивнай оонньууларын кыттыылаахтара күргүөмнээн кэлиилэрэ саҕаланна. Ыалдьыттары улууспут Аан Аартыгар саха омук сиэринэн үрүҥ илгэ кымыһынан, арыылаах алаадьынан айах тутан көрүстүбүт. Бүгүн чугастыы нэһилиэк олохтоохторо курбуһахтар, сарсын-өйүүн Өлтөх нэһилиэгин олохтоохторо көрсүөхтэрэ.
Эбиэккэ диэри ХИФУ хамаандата, Амма, Өлөөн улууһун делегациялара кэлэн аастылар. Биһиги нэһилиэккэ Өлөөн улууһун делегацията сыһыарыылаах, кинилэри, хаһан да көрбөтөх дьоммутун, олох эрдэттэн билсэр дьон курдук үөрэ-көтө көрсөн бэйэбит да долгуйдубут. Ыалдьыттарбыт эмиэ сүргэлэрэ эбии көтөҕүллэн Аан Аартыгы атыллаан аастылар”.
Оттон Суотту нэһилиэгин өттүттэн киирии суолга ыалдьыттары көрсүү тэрээһинэ хайдах бара турарын Суоттутааҕы «Мичээр» сынньалаҥ киинин дириэктэрэ Валентина Патрасова иһитиннэрдэ: “Билиҥҥи туругунан бастакы паромунан үс автобуһунан Өлүөхүмэ, түөрт автобуһунан уонна кыра массыыналарынан ХИФУ делегациялара, ону таһынан, оонньуулары көрө-истэ диэн айаннаан иһэр ыалдьыттары сахалыы кымыһынан, алаадьынан айах тутан үөрэ-көтө күрүстүбүт. Итиэннэ ыалдьыттар ситииигэ салама баайан аастылар. Салгыы үөһээ турар Хомус диэн аартык бэлиэтин сиригэр олохтоох урбаанньыттар аһылык, атыы-тутуу тэрийдилэр. Суол быыла суох, үчүгэй. Сарсыардаттан уу таһар массыына сүүрэн, буору хаптатар үлэни ыыта сылдьар. Бу билигин, үс автобуһунан Үөһээ Бүлүү улууһун делегацията кэллэ”.
Мария Аргунова.
Култуура пресс-киинэ.
