Кулун тутар 18 күнүгэр “Тойон Мүрү” култуура дыбарыаһыгар Александр Гоголев “Ыччат батл” проегын күрэҕэ иккис төгүлүн ыытылынна! Ааспыт сылга уоттаах-күөстээх улахан премьера буолан ааспыта. Кыттыыны ылбыттара Уус-Алдан улууһун араас тэрилтэлэрин үлэһиттэрэ. Быйыл бу күрэх Республиканскай хабааннаах ыытылынна. Ол курдук Нам улууһун “Эҥсиэли” уонна Уус-Алдан “Кам в кубе” көхтөөх ыччата икки хамаандаҕа арахсан көрдөөх алта түһүмэҕи ааспыттара: 10 киинэ эпизоттарын хартыынатын таайыы, быаны маска эрийии, тылы таайыы, көҕүс көҕүскэ, тоһоҕону чууккаҕа саайыы уонна түмүктүүр – ырыаны таайы. Бу киэһээ кыайыыны Уус-Алдан хоһуун ыччатын “Кам в кубе” хамаандата ылан 30 тыһыынчаны уу харчынан тутан үөрүүлэрэ үксээтэ. Түмүккэ Нам улууһун МБУ ЦД им П.П. Ядрихинского «Бэдьээлэ» директора Илларион Пестерев, звукооператора Осипов Ким уонна Мындаабатааҕы сынньалаҥ киин звукооператора Айаал Вырдылин көмүс куоластарынан бэйэлэрин эҕэрдэ-ырыаларынан бу киэһээни киэргэппиттэрэ!
